درس نظامی میں گالیوں کا خفیہ مضمون

وقت اتنی تیزی سے گزر رہا ہے لگتا یوں ہے جیسا کہ وقت کو پر لگ گئے ہوں ۔۔۔ پر بھی ایسے ویسے نہیں ۔۔۔ چمگادڑ کے ۔۔۔۔پچھلے دس سالوں سے ہم وقت کے بارے ہی گلہ کرتے چلے آئے ہیں ۔۔۔۔ مگر اب کہ کچھ ایسا ہے کہ ایک ہی وقت میں حادثات و واقعات کچھ اتنی تیزی سے رونما ہو رہے ہیں کہ محسوس یوں ہوتا ہے ۔۔۔۔ وقت بھی جیسے تھک گیا ہو ۔۔۔۔

ابھی دھماکہ ہوتا ہے ۔۔۔ درجنوں لاشیں گرتی ہیں ساتھ ہی کسی کو چُل اٹھتی ہے وہ اپنا نیا پنگا شروع کردیتا ہے ۔۔۔۔اس کی تازہ مثال حال ہی میں لاہور گلشن اقبال کے خوں ریز دھماکے اور مولویوں کے اضافہ شدہ مذہب ستائیسویں دن کو چالیسواں منا کر سامنے آئی ہے ۔۔۔۔ ویسے پہلے قل تیسرے دن ہوا کرتے تھے اب آج کل قل بھی دوسرے دن کر کے کھابے شابے کھا کر مردے کوثواب پہنچا دیا جاتا ہے ۔۔۔۔ چاہے بیچارا مردہ ساری عمر لوگوں کو تکلیف دیتا رہا ہو، لوگوں کا مال ہڑپ کرتا رہا ہو ۔۔۔ اس کو ثواب ضرور پہنچایا جاتا ہے ۔یہ ثواب اصل میں اس کو نہیں اپنے پیٹ کو پہنچایا جاتا ہے ۔۔۔

ویسے ایک بات مجھے بڑا دکھ دے رہی ہے کہ میں نے مذہب کو زیادہ کیوں نہیں پڑھا ۔۔۔۔ اگر یہ بات مجھے پتہ ہوتی کہ درس نظامی میں ان محترم حضرات نے غلیظ گالیوں کا بھی ایک خفیہ مضمون رکھا ہوا ہے تو میں یہ تعلیم ضرور حاصل کرتا ۔۔۔۔ صحافت اور دوائیوں کی خجل خواری سے تو بہتر ہوتا کہ اس سے مجھے کسی مزار کا ٹھیکہ مل جاتا ۔۔۔۔ اگر اور زیادہ محنت کرتا تو میں بھی گالیوں کے مقابلے میں بہتر پوزیشن لے کر عالم ، مفتی یا شیخ بن سکتا تھا ۔ ۔۔۔۔ بحرحال اللہ کا شکر ادا کرتا ہوں کہ اللہ نے مجھے صحیح جگہ رکھا ۔

عالمات اور علماء کرام بننے کے لئے درس نظامی کا چھ سالہ کورس لڑکیوں کے لئے اور آٹھ سالہ لڑکوں کے لئے ضروری ہوتا ہے ۔۔۔۔۔اور اسی طرح مفتی بننے کے لئے یعنی فقہ و فتاوی کی ریسرچ کے لئے دوسالہ مزید کورس کروایا جاتا ہے ۔اس کے بعد وہ مفتی بن جاتا ہے ۔بعد آزاں شیخ الحدیث بننے کے لئے احادیث مبارکہ کی درس و تدریس اور حافظہ حدیث کا مسنتد علم ہونا ضروری ہے ۔۔۔ اور اسی طرح شیخ التفسیر کہلانے کے لئے قرآن کریم کی مختلف تفاسیر کی درس و تدریس کا مستند علم ہونا ضروری ہوتا ہے ۔

اور ان لوگوں میں اپنے تئیں عالم ، مفتی ، شیخ الحدیث اور شیخ القرآن بھی موجود تھے ۔۔۔۔ اب جہاں ایسے لوگ موجود ہوں وہاں گالی دینا تو درکنار اس کا تصور بھی محال ہوتا ہے۔۔۔۔۔اب کیا وجہ ہے کہ ایسا ہوا ۔۔۔۔۔ یا تو یہ لوگ عالم نہیں تھے یا عالم کے مرتبے کے لائق نہیں ۔۔۔۔۔۔

کمال کی تو بات یہ ہے کہ اتنے بڑے بڑے عالم ، مفتی ، شیوخ نے بھی آج تک عوام کو یہ ہوا نہیں لگنے دی کہ ان کے مذہب کے درس میں غلیظ گالیوں کا بھی ایک مضمون موجود ہے ۔۔۔۔۔اب جبکہ ہوا لگ چکی تو میں یہ سوچتا ہوں کہ کیوں نا میں بھی ایک گالیوں کا مقابلہ کروا ہی دوں جس میں ملک کے نامی گرامی عالم ، مفتی اور شیوخ حصہ لیں ۔۔۔۔۔ اوًل آنے والے معزز اصحاب کو میں گورنمنٹ اور ممتاز قادری کے گھر والوں سے منت ترلہ کرکے اس کے مزار کا ٹھیکہ تو لے ہی دوں گا۔